मोर्चाले पूर्व-पश्चिम राजमार्गको पक्की पुल भत्कायो
राजविराज : प्रहरीसँगको झडपमा तीनजना मारिएपछि आक्रोशित मधेसी मोर्चाका कार्यकर्ताहरुले पूर्व-पश्चिम राजमार्गस्थित सुन्दरीको खोलाको पक्की पुल भत्काइएदिएका छन् ।
शनिबार राति भारदह र रुपनीमा तीनजना मारिएपछि उग्र बनेका मोर्चाका कार्यकर्ताले सप्तरीको बरमझियास्थित सुन्दरी खोलामाथिको पक्की पुल आधा भत्काइदिएका हुन् ।
मोर्चाका उग्र कार्यकर्ताले पुल भत्काउन थालेपछि त्यहाँ पुगेको प्रहरीले लाठीचार्ज गरेपछि झडप भएको छ । झडपका क्रममा दुबै तर्फ ६ जनाबढी घाइते भएका छन् ।
पुल भत्काइएपछि त्यहाँबाट सवारीसाधन एकतर्फीमात्र चलाउन मिल्ने भएको छ । त्यस्तै प्रदर्शनकारीहरुले सप्तरीकै रुपनी मोडस्थित प्रहरी बिटमा पनि आगो लगाएका छन् ।
मोर्चाका कार्यकर्ताहरुले गरेको आगजनीबाट प्रहरी बिट क्षतिग्रस्त भएको छ ।
मोर्चा र प्रहरीबीच सदरमुकाम राजविराज तथा पूर्व-पश्चिम राजमार्गका ठाउँ ठाउँमा अहिले पनि झडप जारी रहेको छ । सदरमुकाममा भएको झडपमा प्रहरीले ६ सेल अश्रुग्यास हानेको छ ।
