विमानस्थलमा हडताल, हजारौँ यात्रु अलपत्र :
चिली: विमानस्थलमा कार्यरत कामदारको २४ घण्टे हडतालका कारण मङ्गलबार चिलीमा हजारौँ मानिस विभिन्न विमानस्थलमा अलपत्र परेका छन् ।
विमानस्थल कर्मचारीले आफ्नो सेवा निवृत्तिभरण वापत पाउने सुविधा बढाउनुपर्ने जनाउँदै हडताल गरेका हुन् ।
करिब ९० प्रतिशत वा तीन हजार उड्डयन सम्बद्ध कर्मचारीको समर्थन तथा सहभागिता रहेको उक्त हडतालका कारण कुनै पनि आन्तरिक तथा बाह्य उडान गरिएन ।
हडतालबाट उडान रद्द गरिए पनि विमानस्थलको सुरक्षा अवस्था भने सामान्य भएको नागरिक उड्डयन प्राधिकरणका महानिर्देशक म्याक्सीमिलानो लारान्सियाले बताए ।
हडतालको असर शतप्रतिशत विमानस्थलमा परेको र यहाँबाट हुने सबै उडान रद्द गरिएका छन्, यद्यपि अन्तर्राष्ट्रिय उडान आगमनमा भने खासै असर नपरेको उनले बताए । विमानस्थलले आपतकालीन हवाई परिवहन भने यथावत चलेका छन् ।
हडतालका कारण दिनभरमा ७० हजार यात्रु विमानस्थलमा अलपत्र अवस्थामा रहनुपर्ने प्राधीकरणले दाबी गरेको छ ।
