अबको एक दशकभित्र काठमाडौं–पोखरा–लुम्बिनी रेल चढ्ने नेपालीको सपना पूरा हुने
काठमाडौं । कुनै अवरोध नआए अबको एक दशकभित्र काठमाडौंदेखि पोखरा हुँदै लुम्बिनीसम्म रेल चढेर पुग्ने नेपालीको सपना पूरा हुनेछ ।
नेपाल भित्र रेल्वे सेवा निर्माणमा चिनियाँ सरकारले सहयोग गर्ने सहमतिसँगै विभिन्न चिनियाँ कम्पनीले अग्रसरता बढाएपछि नेपालीको रेल चढ्ने सपना पूरा हुने सम्भावना बढेको हो ।
एउटा चिनियाँ कम्पनीले काठमाडौं–पोखरा रेल्वे लाइनको सम्भाव्यता अध्ययनको मस्यौदा सरकारलाई बुझाएको छ भने अर्को चिनियाँ कम्पनीले रसुवागढी–काठमाडौं रेल्वे लाइनको सम्भाव्यता अध्ययन गर्न प्रधानमन्त्री कार्यालयमा निवेदन पेश गरेको छ ।
पोखरा विमानस्थलको निर्माण ठेक्का पाएको चिनियाँ कम्पनी चाइना सिएएमसी इन्जिनियरिङ लिमिटेडले पोखरा–काठमाडौं रेल्वे लाइनको सम्भाव्यता अध्ययनको ड्राफ्ट सरकारलाई बुझाएको हो । भौतिक पूर्वाधार तथा यातायात मन्त्रालयले गत मंसिर १५ गते स्एिएमसी कम्पनीलाई पोखरा–काठमाडौं रेल्वेको सम्भाव्यता अध्ययन गर्न स्वीकृति दिएको थियो ।
रसुवागढी–काठमाडौं रेल्वेको सम्भाव्यता अध्ययन गर्न अर्को चिनियाँ कम्पनी चाइना रेल्वे कन्स्ट्रक्टन कर्पोरेशन लिमिटेड सिआरसिसीले प्रधानमन्त्री कार्यालयमा निवेदन दिएको छ । यो कम्पनीले दुई साताअघि रसुवाढी–काठमाडौं रेल्वेको सम्भाव्यता अध्ययन गर्न प्रधानमन्त्री कार्यालयमा निवेदन दिएको हो । जेठ १५ गते संसदमा प्रस्तुत आर्थिक वर्ष २०७३÷०७४ बजेटमा रसुवागढी–काठमाडौं रेल्वेको सम्भाव्यता अध्ययन २ वर्ष भित्र गरिसक्ने उल्लेख गरिएको छ ।
