प्रधानमन्त्रीले भोलि राजीनामा दिने
काठमाडौं : प्रधानमन्त्री सुशील कोइरालाले शुक्रबार राजीनामा दिने भएका छन् ।
संविधानसभाबाट संविधान जारी भएपछि नयाँ सरकार निर्माणका लागि बस्न लागेको व्यवस्थापिका संसद्को बैठकमा प्रम कोइरालाले राजीनामा दिने भएका हुन् ।
प्रम कोइरालाले भोलि नै राजीनामा दिने संकेत भावी प्रधानमन्त्रीका रुपमा प्रस्तुत एमालेका अध्यक्ष केपी शर्मा ओलीले बिहीबार काठमाडौंमा भएको एक कार्यक्रममा गरेका हुन् ।
काठमाडौंको होटल अन्नपूर्णमा विदेशी सञ्चारमाध्यमका नेपालस्थित पत्रकारहरुसँग भएको अन्तरक्रिया कार्यक्रममा एमाले अध्यक्ष ओलीले सो कुरा बताएका हुन् ।
अन्तरक्रियामा सहभागी पत्रकारहरुले प्रधानमन्त्रीको राजीनामा भोलि नै हुन्छ त भन्ने प्रश्नमा उनले सकारात्मक प्रतिक्रिया दिए ।
असोज ३ गते संविधान जारी गरेर संविधानसभा विघटन भएपछि सभामुख सुबास नेम्वाङले शुक्रबारका लागि संसद् बैठक आह्वान गरेका छन् ।
नयाँ संविधानमा संसद् बैठक शुरु भएको सात दिनभित्र नयाँ प्रधानमन्त्री छानिसक्नुपर्ने प्राबधान छ ।
