राजेन्द्र महतोले रुँदै भने - ताकी ताकी गोली ठोकीएको छ !
वीरगञ्ज, ७ मंसिर । सद्भावना पार्टीका अध्यक्ष राजेन्द्र महतोले सरकारको दमनप्रति कडा आपत्ति जनाएका छन् । मधेस आन्दोलन सयौं दिन पुगेको अवसरमा पर्साको वीरगञ्जमा आयोजित पत्रकार सम्मेलनमा बोल्दै महतोले वार्ता सकारात्मक रुपमा अघि बढीरहेको बेला वीरगन्जमा शान्तिपूर्ण धर्नामा गोली चलाएर सरकारले वार्ता बिथोलेको र फेरि उस्तै घटना सप्तरीमा दोहोर्याएको आरोप लगाए ।
‘एकातिर वार्तामा बोलाउने, अर्काेतिर आन्दोलनमा चरम दमन गर्ने सरकारको यो कस्तो चाला हो ? चारजना मधेसीको टाउकोमा ताकीताकी गोली ठोकिएको छ’ नेता महतोले भने- ‘यो अवस्थामा कुनै पनि हालतमा वार्ता र सहमति हुन सक्दैन ।’ उनले राजधानीमा रहेका मोर्चाका नेताहरुलाई वार्ताको वातावरण सकिएकाले आन्दोलन र नाकाबन्दीलाई सशक्त बनाउन मधेश आउन आग्रह गरे । उनले सरकारले आफ्नो दमनकारी नीति नसच्याए मधेसी जनताले शहिदको नाममा प्रतिकार गर्ने चेतावनी दिए । ‘मधेसीको टाउको ताकी ताकी गोलि हानिएको छ,’ आँसु पुछ्दै उनले भने-‘यसको बदला मधेसी जनताले अवश्य लिनेछन् ।’
आन्दोलनले उचाइ लिएपछि सरकारले घुसपैठ गराएर एम्बुलेन्स र औषधीको गाडीमाथी आक्रमण गराइरहेको उनको आरोप छ । नेता महतोले मोर्चाले मधेसको माग बारे ११ बुँदे धारणा राखिसकेकोले संविधान बनाउने तीन दलले साझा धारणा कायम गर्नुको साथै दमन बन्द गरेपछि मात्र मुलुकले निकास पाउने बताए ।
