प्रचण्ड र ओलीलाई सवक सिकाउने भारतीय खेल !
नेपालको संविधानसभाबाट ९० प्रतिशत भन्दा बढी सभाषदले हस्ताक्षर गरेको संविधान भारतले स्वीकार गरेन । उल्टो नेपालमाथि नाकाबन्दी थोपर्यो । भारतीय नाकाबन्दीपछि नेपालमा भारतविरोधी भावना चुलिएको छ । यही बिचमा नेपालमा नयाँ सरकार बन्ने चर्चाकाबीच भारतले भारतविरुद्ध आक्रामक रबैयासहित प्रस्तुत भएका नेपाली राजनीतिका जवर्जस्त २ खेलाडी केपी शर्मा ओली र पुष्पकमल दाहाल प्रचण्ड गठबन्धन रहेको मोर्चालाई परास्त गर्न भारत हात धोएर लागेको चर्चा चल्यो । तर भारतविरोधीकोरुपमा दरिएका ओली प्रधानमन्त्री चुनिएरै छोडे र भारतको इसारामा प्रधानमन्त्रीको उम्मेदवार बनेको भनिएका सुशील कोइराला पराजित हुन पुगे ।
भारतले मन नै नपराएका कोइराला कसरी बने ‘भारत परस्त’
अनौठो दृष्य त त्यतिबेला देखियो जतिबेला प्रधानमन्त्री बन्नासाथ भारत विरोधी उम्मेदवार भनिएका ओलीलाई भारतीय प्रधानमन्त्री नरेन्द्र मोदीले फोन गरेर पहिलो बधाइ ज्ञापन गरे । ३ साता देखि करिव करिव ठप्प जस्तै पारिएका भारतीय नाकाहरु समेत सहज गरियो र सबैभन्दा मारमा पारिएको इन्धन आपुर्ति समेत नेपालमा भित्रिन लागेको संकेत देखियो । यी दृष्यहरुले भारत विरोधी भनिएका केपी ओलीमाथि भारतसँग भित्र भित्रै कुनै सम्झौता गरेका त होइनन् भन्ने आशंका पैदा भयो । तर दृष्यहरु फेरिएका छन् र भारतविरुद्ध लागेर सरकार बनाउन लागेका यी २ राजनीतिक खेलाडीलाई भारतले सवक सिकाएरै छोड्ने संकेत गरेको छ ।
भारतले बुझिनसक्नुको ब्यवहार प्रदर्शन गर्दै अघोषित नाकाबन्दी लगाएको पृष्ठभूमिमा भारतप्रति लक्षित राष्ट्रियताको मुद्धामा गठबन्धन पैदा गरेर प्रधानमन्त्री भएका ओलीलाई सबैभन्दा पहिलो बधाइ दिने उनै भारतीय प्रधानमन्त्री नरेन्द्र मोदी थिए । सपथ सम्म नलिएका ओलीले पहिलो फोनमै मोदीसँग नाकबन्दीबारे कुरा गरेर हल्का हैसियत देखाएको भन्ने चर्चा चलिरहेको समयमा नाकाहरुमा केही सहजता देखाएर भारतले अनौठो ब्यवहार देखायो ।
ओली र प्रचण्डः प्रमुख तारो
ओली जहिल्यै भारतसंग राम्रै सम्वन्ध कायम गरेका नेतामा गनिन्छन् तरपनि भारतले विश्वास गरेका पात्र बन्न सकेका छैनन् । उनी प्रधानमन्त्री बन्नु अघि भारतीय मिडियामा देखिएका प्रतिक्रियाले यही संकेत गर्छ । ओली प्रधानमन्त्री बनेपछि पनि भारतका कतिपय मिडियाले भारतले ओलीलाई भरोसा गर्न सक्ने भन्दै हेडलाइन बनाएका छन् ।
नेपालमा चीनको षडयन्त्रः भारतीय मिडिया रिपोर्ट (भिडियो सहित)
ओलीलाई प्रधानमन्त्री बनाएका प्रचण्डले संविधान बनाउनु केही समय अघि भारतको भ्रमण गरेर फर्किएका थिए । नेपाल आएर भारतको इच्छा ब्यक्त हुने भाषामा बदलाव ल्याएका प्रचण्ड भारतले संविधान जारी गर्ने मिति तोकिएपछि पठाएको विशेष दुत पठाएपछि भने आक्रामक देखिए । उनले सिधा भाषामा भने -हामी दिल्लीको एसम्यान बन्ने वाला छैनौं । प्रचण्डको बोलीले दिल्लीसम्म खतरनाक तरंग पैदा गर्यो । भारतले दवावलाई नाकाबन्दीकै स्तरमा पुर्यायो जुन अहिले सम्म कायम छ ।
प्रचण्डकै स्तरमा नभएपनि ओलीले पनि भारतीय नाकबन्दीप्रति खुला असन्तुष्टि ब्यक्त गरिरहे जवकी सत्तामा रहेका सुशील कोइराला यसबारेमा एक शब्द बोल्न तयार भएनन् । भारतले संविधानको अन्तिम प्रक्रिया रोक्नका लागि सुशील कोइराललाई प्रत्यक्ष नभएर भारतसँग निकट भनिएको राष्ट्रपति कार्यालयबाट बनाएको चर्चा थियो । त्यही दवाव थेग्न गाह्रो भएरै होला उनले पक्रियालाई अझै केही रोक्न ओली र प्रचण्ड गुहारेका थिए । तर सही समयमा ओली र प्रचण्डले त्यसलाई अस्वीकार गरेर अघि बढे ।
प्रचण्डले भारतसँग पङ्गा लिएको यो पहिलो घटना होइन । किन भने उनले यस अघि नै यस्तो अनुभवबाट पार भैसकेका हुन् । तर प्रधानमन्त्री बनेका केपी शर्मा ओली भने पहिलो पटक भारतसँग आमने सामने भएका छन् । राष्ट्रियताको नारामा प्रधानमन्त्री बन्ने माहौल बनेको पृष्ठभूमिमा ओलीलाई आगामी दिन झनै कठिन हुने देखिएको छ । किन भने भारतले निहुँ खोज्ने प्रचण्ड र ओलीलाई झुकाएरै छाड्ने रणनीति अख्तियार गरेको संकेत देखाएको छ । ओली प्रधानमन्त्री बनेपछि केही खुकुलो बनेको भनिएको नाकाबन्दी खुकुलो भएपनि इन्धनमाथिको भारतीय राजनीति पुरानै शैलीमा आएको छ । नाका खुलेपनि प्रयाप्त इन्धन नदिएर दशैं मनाउन समस्या पार्दिने र ओली सरकारलाई शुरुमै धक्का दिने भारतीय रणनीति रहेको जानकारहरु बताउँछन् । भारतसँग निहुँ खोजेर सत्ता चलाउन सकिन्छ भन्ने मान्यता स्थापित नहोस् भन्नका लागि पनि ओली-प्रचण्ड गठबन्धनलाई साइजमा राख्ने रणनीति अनुसार कम्तिमा दशैं अघि नाका सामान्य नबनाउने र इन्धन संकट चर्काइदिने तयारीमा भारत रहेको बताइन्छ ।
मन्त्री देखि राष्ट्रपति सम्मः भारतीय आँखा
भारतले आफूसँग प्रत्यक्ष ठोक्किन आइपुगेका ओली र प्रचण्डलाई संविधानमा यस अघि गर्ने भनिएका संसोधन नगरे सम्म सजिलो नपार्ने रणनीति बनाएको भारतीय श्रोतहरुले नै खुलासा गरेका छन् । त्यसकै परिणामस्वरुप पछिल्लो समयमा सरकारमा मन्त्री छनौट देखि राष्ट्रपति उपराष्ट्रपति सम्मका पदमा समेत आफूले भनेका ब्यक्ति हुनु पर्ने भनेर घुमाउरो दवाव दिने थालेको बताइएको छ । यसकै एक कडीकोरुपमा हाल पदमा रहेका डा रामबरण यादवलाई निरन्तरता दिन सत्तारुढ दलहरुमाथि विभिन्न ढंगले दवाव बढाइएको छ । उनलाई निरन्तरता दिँदा मधेशी समुदायको प्रतिनिधित्व पनि हुने र सत्तारुढ ओली- प्रचण्ड गठबन्धन भन्दा बाहिर बाट हुने भएकाले भारतले यसका लागि बलियो लबिङ बनाइसकेको बताइन्छ ।
भारतीय अखबारसँग रामबरण यादवले भने- फेरि राष्ट्रपति बन्न पाए बन्छु
रामबरणलाई निरन्तरता दिन नसके भारतले मन पराएका अन्य उम्मेदवारलाई राष्ट्रपतिमा स्थान दिनु पर्ने दक्षिणको दवाव छ । एमाओवादीमा चीन निकटको छवि बनाएका कृष्णबहादुर महरालाई उपप्रधान तथा गृहमा जानबाट रोक्न समेत भारतीय पक्षबाट खेल भएको खुलासा एमाओवादीका नेताले नाम नबताउने शर्तमा गरेका छन् ।
महराको विषयमा कुरा गर्दा ओलीले प्रचण्डलाई फोनमै थर्काए
भारतीय लविङकै कारण आन्दोलनबाट एकाएक सत्तामा पुगेका विजयकुमार गच्छदारले भारतीय लविङकोरुपमा सरकारमा काम गरिरहेको बताइएको छ । त्यसैगरी हिन्दुवादीकोरुपमा भारतीय प्रधानमन्त्री नरेन्द्र मोदीसँग निकट रहेका परराष्ट्रमन्त्री कमल थापालाई समेत सत्तारुढ गठबन्धन बाहिरबाट राष्ट्रपति नखोजे राम्रो नहुने सन्देश प्राप्त भएको श्रोत बताउँछ । असन्तुष्ट मधेशी दल वा कांग्रेसलाई राष्ट्रपति दिएमा चाँहि भारतले सहज ब्यवहार देखाउन तयार हुने दक्षिणको सन्देश छ । भारतीय दवावकैबीच प्रचण्डले महरालाई पार्टिबाट सरकारको नेतृत्वमा पठाउन बोल्ड डिसिजन गरेका छन् । तर भारतीय दवावकाबीच प्रधानमन्त्री ओलीले कति खुट्टा टेक्न सक्छन् भन्ने चाँहि आगामी दिनका केही घटनाक्रमले पुष्टी गर्नेछ ।
